ನಮಸ್ಕಾರ... ಬನ್ನಿ.. ಏನೋ ಆ ಕ್ಷಣದಲ್ಲಿ ತೋಚಿದ್ದು ಗೀಚಿ ಒಂದಷ್ಟು ಗುಡ್ಡೆ ಹಾಕಿದ್ದೇನೆ. ಒಳಗೆ ಬಂದುಬಿಟ್ಟಿದ್ದೀರಿ, ಇನ್ನೇನೂ ಮಾಡುವುದು ಮತ್ತೆ, ಬನ್ನಿ ಭಾವಗೊಂಚಲಲ್ಲಿ ನೇತಾಡೋಣ....!

Saturday 31 March 2012

ಗೋಡೆ


ನನ್ನ ಅವಳ ನಡುವೆ ಒಂದು ಗೋಡೆಯಿದೆ
ಎಲ್ಲಾ ಧರ್ಮದ ಚಿಹ್ನೆಗಳು
ಚಿಹ್ನೆಗಳೊಳಗಿನ ನೂರು ಚುಕ್ಕೆಗಳು
ಒಂದಕ್ಕೊಂದು ಢಿಕ್ಕಿಸಿಕೊಂಡು ಭೂಕಂಪಿಸಿದೆ

ಕತ್ತಲಾದಂತೆ ಜಗತ್ತಿಗೆ ಚಂದ್ರ ಬೆತ್ತಲಾದಂತೆ
ನೆನಪುಗಳ ನಕ್ಷತ್ರಗುಳುದುರುವ ಹೊತ್ತಿನಲ್ಲಿ
ನೀಲಾಕಾಶ ತುಂಬಿದ ಮೋಡಗಳ
ಅಂಚಿನಲ್ಲಿ ನನ್ನವಳು ಕೈ ನೀಡಿ
ಮುಕ್ಕೋಟಿ ದೇವರುಗಳನ್ನು ಬೇಡಿ
ಎಳೆಯುತ್ತಾಳೆನ್ನನ್ನು ಗಮ್ಯಕ್ಕೆ, ಅದಮ್ಯಕ್ಕೆ

ಸಂಜೆಯಾದಂತೆ ಮಹಡಿ ಮೇಲೆ ನಿಲ್ಲುವೆನಗೆ
ಅದೆಲ್ಲಿಂದಲೋ ಎದೆ ಕೊಯ್ಯುವ ಸಂಗೀತ
ಜಾರಿದ ಕಣ್ಣೀರು ಸ್ಫೋಟಗೊಂಡು
ವಿಹ್ವಲ ಹೃದಯ ಮತ್ತೆ ಆಸ್ಫೋಟಗೊಂಡು
ನಡುಗುವ ಹೊತ್ತಿಗೆ
ಅಂದು ಬೊಗಳಿದ ಆ ನಾಯಿಗಳು
ಗೋಡೆ ಎಡೆಗೆ ಬಂದು ನಿಂತಿವೆ ದರಿದ್ರಗಳು

ಕೆಳಬೀದಿಯವು ಮೇಲ್ಬೀದಿಯವು
ನೂರು ಕೇರಿಯಿಂದ ಸಾರಿಬಂದಿವೆ ಜೊಲ್ಲು ಸುರಿಸಿ
ಬಳಸೊಂದು ವೃತ್ತ ಎಳೆದು
ಹಣೆ ಮೇಲೆ ಜಾತಿ ಜಾತಿ ಎಂದು ಬರೆದು
ಗಾಂಧಿ ನಕ್ಕ ಹಣಕ್ಕೆ ನಾಲಗೆ ನೊಣೆದು
ಸುರಿಸಿದ ಕೊಳಕು ಜೊಲ್ಲಿಗೆ
ಹಚ್ಚಿಕೊಂಡ ಬೆಂಕಿಗೆ ಅವೇ ಸುಟ್ಟುಹೋಗುತ್ತಿವೆ
ನೆಗೆದು ತಪ್ಪಿಸಿಕೊಳ್ಳಲಾಗದು
ಅವೇ ಕಟ್ಟಿದ ಗೋಡೆಗೆ ಬಾಗಿಲೇ ಇಲ್ಲ

ಥೂ... ಅವು ಹುಚ್ಚು ನಾಯಿಗಳು
ಅವುಗಳ ಕಾಲ್ಧೂಳೆಬ್ಬಿಸಿದ ಮಸುಕಿಗೆ
ನನ್ನವಳ ಮೊಗ ಅದೆಲ್ಲೋ ಮುಚ್ಚಿಹೋಗಿವೆ
ಹಲುಬುವ ನಾಯಿಗಳ ಕೋರೆ ಹಲ್ಲಿನಲ್ಲಿ
ಸುರಿದ ಬಿಸಿ ರಕ್ತದ ಕಣದಲ್ಲಿ
ಅದೇ ಹೃದಯ ಬಡಬಡ ಬಡಿಯುತ್ತಿದೆ
ಹೃದಯ ಬಿರುಗಾಳಿಯೆಬ್ಬಿಸಿದ ನೋವಿಗೆ
ಮನ ನೊಂದು ಬೆಂದು ನಡುಗಿದೆ, ಗುಡುಗಿದೆ

ಕೈ ನೀಡಿದ್ದೇನೆ ಪ್ರಿಯೆ
ಬೆರಳು ಸೋಕು ಸಾಕು ಎಳೆದುಕೊಳ್ಳುತ್ತೇನೆ
ಬೆನ್ನ ಮೇಲೆ ಹೊತ್ತು, ಖುಷಿಯಲ್ಲಿ ಅತ್ತು
ಮೋಡಗಳಾಚೆ ತೇಲಿಹೋಗುತ್ತೇನೆ
ಅಲ್ಲೆಲ್ಲೋ ಹಕ್ಕಿಯಂತೆ ಹಾರಾಡೋಣ
ಎಲ್ಲಾ ಮರೆತು ಮೋಡಗಳೊಟ್ಟಿಗೆ ತೇಲೋಣ
ತಟ್ಟಿ ನಿಲ್ಲುತ್ತೇನೆ ತೊಡೆ
ಪುಡಿಪುಡಿಯಾಗಿ ಹೋಗಲಿ ಕೈಗಳ ನಡುವಿನ ಗೋಡೆ

Sunday 25 March 2012

ರಸ್ತೆ

ನಮ್ಮಜ್ಜಿ ಅಮ್ಮನ ತಲೆ ನೇವರಿಸಿ ಅತ್ತಂತೆ
ಸೂರ್ಯನಳುತ್ತಿದ್ದಾನೆ, ಚಣವಷ್ಟೇ ನಾಟಕ
ತಂಗಾಳಿ ಬೀಸಿ ತಂಪೆರದರೂ ಧೂಳೆದ್ದಿದೆ
ಇಕ್ಕೆಲಗಳಲ್ಲಿ ಕ್ಯಾಕರಿಸಿ ಉಗಿದು
ಮೂಗು ಮುಚ್ಚಿಕೊಂಡು ಮುಂಜಾನೆಗೆ
ಬಹಿರ್ದೆಸೆಗೆ ಕೂರವವರು ಬಂದಿದ್ದಾರೆ

ಹೌದು
ಸಾವಿರ ವರ್ಷ ಆಯಸ್ಸು ಈ ರಸ್ತೆಗೆ
ಹಳ್ಳ ಕೊಳ್ಳ ಹೆಗ್ಗು ಸಿಗ್ಗು
ಅಲ್ಲಲ್ಲಿ ಗಾಯದ ಈ ದಾರಿಗೆ
ಹಾವಂತೆ ಬಳುಕಿ ಹರಿದರೂ ಹಸುವಿನೊಲವು
ಇಕ್ಕೆಲಗಳ ಕಸುವಿನ ಬೆಳೆಯ ಮುಟ್ಟದ ಛಲವು

ಕಷ್ಟದ ಮೂಟೆ ಹೊತ್ತು, ನೋವಿನಲ್ಲಿ ಅತ್ತು
ಒಂದಷ್ಟು ಬಸ್ ಗಳು ಓಡಿದರೆ
ಒಳಗಿನವರಿಗೆ ಸುಖಗನಸು
ಟೈರ್ ಸರಿಸಿದ ಸೆರಗ ಮೆಲಕ್ಕೆತ್ತಿ
ಇಕ್ಕೆಲಗಳ ಪಾರ್ಥೇನಿಯಂನ ನಗುವಿಗೆ ನಿರುಮ್ಮಳಿಸಿ
ಬೆನ್ನು ಕೊಟ್ಟ ರಸ್ತೆಯಿಂದ ಎದ್ದ ಧೂಳಿಗೆ
ಅಸಹ್ಯಸಿ ಜನರುಗಿದ ಎಂಜಲಿಗೆ
ಬೇಸರಿಸದು ರಸ್ತೆ, ಅದೇ ಅದರವಸ್ಥೆ

ನಿನ್ನೆ ತಾನೇ ತೆಗೆದುಕೊಂಡ ಹೊಸ ಬೈಕ್
ಆ ಭೂಪ ಹತ್ತಿಸಿಕೊಂಡ ನಲ್ಲೆಯನ್ನು ಅದೇ ರಸ್ತೆಯಲ್ಲಿ
ಆತನಿಗೋ ಹರೆಯದ ಕಸುವು
ರಸ್ತೆ ಚಿಮ್ಮಿಸಿದ ಧೂಳನ್ನು ಕೊಡವಿ
ಮತ್ತೆ ಅಲ್ಲೇ ಹರವಿ, ಟೈರ್ ತಿರುವಿ
ಹಳ್ಳಕೊಳ್ಳ ಬಳಸಿ ಹೋದ
ಆದರೆ ಅದೂ ರಸ್ತೆಲ್ಲಿನ ಕೆತ್ತಿದ ಗಾಯ
ಅಪ್ಪಿತಪ್ಪಿ ತಪ್ಪಿಸದೇ ಗುಂಡಿಗೆ ಬಿಟ್ಟರೂ
ನಲ್ಲೆಯ ಎದೆ ಸೋಕಿದ ಮಜ
ರಸ್ತೆಗೋ ನೋವುಣುವ ಲಿಖಿತ ಸಜ

ಈ ರಸ್ತೆ ಇಂದು ನಿನ್ನೆದಲ್ಲ, ಮೊನ್ನೆಯದೂ ಅಲ್ಲ
ಆಯಸ್ಸಿರಬಹುದು ಸಾವಿರ ವರ್ಷ
ತಣ್ಣಗಾಗುತ್ತದೆ ಸುರಿಸಿದರೆ ಮೋಡ ವರ್ಷ
ಆದರದು ಕ್ಷಣಿಕವಷ್ಟೆ
ನೋಡಿದಲ್ಲೆಲ್ಲಾ ಬರೀ ಗಾಯಗಳೇ
ಸುಯ್ಯನೇ ಬಂದ ಲಾರಿ
ಹುತ್ತದ ಬಿಲದೊಳಗಿಣುಕಿದ ಹಾವಿನ ತಲೆಯ
ನೂರಾರು ಮನುಷ್ಯರಿಣುಕಿದ ಬಸ್ಸು
ನಮ್ಮೂರಿನ ಮಾಚನೋಡಿಸಿದ ಬಂಡಿ
ಅದರ ಗಾಯದ ಮೇಲೆ ನೆಗೆ ನೆಗೆದು
ಮತ್ತೊಂದಷ್ಟು ಗಾಯ ಬಗೆ ಬಗೆದು
ಓಡುವುದೇ ಆಯಿತು
ಗಮ್ಯ ಸೇರುವಾಸೆ ಮರೆತು ಅಲ್ಲೇ ಮಲಗಿದೆ
ಬಂದವರಿಗೆ ಮುಂದಿನ ದಾರಿ ಬೇಕಷ್ಟೆ

ಬೇಸಗೆ ಬಂತೆಂದರೆ ಸುಟ್ಟ ಇಕ್ಕೆಲಗಳು
ಅತ್ತ ಸೂರ್ಯ ಮೈ ಉರಿಯುತ್ತಾನೆ
ಮಳೆಗಾಲಕ್ಕೆ ಬಳುಕಿದ ಅದೇ ಇಕ್ಕೆಲ ಜಲ
ರಸ್ತೆಗೆ ನುಗ್ಗಿ ಮೈತುಳಿದು ಚರ್ಮ ಸೆಣೆದು
ಗುಮ್ಮನಂತೆ ಮಲಗಿಕೊಳ್ಳುತ್ತದೆ
ಪಕ್ಕಿ ಪಿಕ್ಕೆ, ಮೇಲೊರಗುವ ಮರದ ಹೆಣ
ಸುಂಟರಗಾಳಿ ಸುರಿವ ಕಾಡು ಕೊಳೆ
ಕೊಚ್ಚೆ ಮೇಲೆ ರಚ್ಚೆ ಹಿಡಿವ ಮಳೆ
ಎಲ್ಲವೂ ಸೇರಿ ರಸ್ತೆಯನ್ನು ಮಲಗಿಸಿವೆ ಏಳದಂತೆ
ಡಾಂಬರು ಸೀರೆಯುಡಿಸಲು ಬಂದವನ ಮಾತು
ನಿಮಗೆ ಗೊತ್ತಲ್ಲ ಬರೀ ಮಾತಿನ ಮಂತ್ರ
ಅದೂ ಐದು ವರ್ಷಕ್ಕೊಮ್ಮೆ ಮಾತ್ರ

ಪಾಪ
ಆ ರಸ್ತೆ ನೋಡಿದಾಗ ಅಮ್ಮನ ನೆನಪಾಗುತ್ತದೆ