ಮೌನವೆಂದರೆ
ಯಾರೂ ಇಲ್ಲದ ನನ್ನ ಕೋಣೆಯಲ್ಲಿ
ನಾನೊಬ್ಬನೇ ಕೂಗಿಕೊಳ್ಳುವುದು
-
ಬೆಳಕು ಪ್ರಪಂಚ ತೂಗಿತೆಂಬ
ಭ್ರಮೆಯೊಂದಿಗಿದ್ದೆ
ಅವಳು ನೆಟ್ಟ ಬೇವೊಳಗೆ ಸೂರ್ಯ ನಕ್ಕ
-
ಮೇಲೆ ಹೊದಿಸಿದ ರಗ್ಗಿನಲ್ಲಿ
ಬಣ್ಣದ ಚಿಟ್ಟೆಗಳಿದ್ದರೂ
ಒಳಗೆ ಸುಕ್ಕು ಹಾಸಿಗೆಯಿದೆ
-
ಹುತ್ತಕ್ಕೆ ಹಾಲೆರೆಯುವಾಗ ನನ್ನವಳು
ಹಸಿದ ಮಗು ಹಿಡಿದುಕೊಂಡ ನಾನು
ಮನೆಯಲ್ಲಿ ಜಿರಲೆ ಸಾಯಿಸುತ್ತಿದ್ದೆ
-
ಅಮ್ಮ ತಿನ್ನಲು ಕೊಟ್ಟ ಹುಳಿಮಾವು
ಹೃದಯಾಕಾರದಲ್ಲಿತ್ತು
ಚಾಕುವಿನಲ್ಲಿ ಕತ್ತರಿಸಿಬಿಟ್ಟೆ
-
ಆ ಬಾವಿಯೊಳಗೆ ಮೋಡವಿದೆ
ಕೂಗಿಕೊಳ್ಳುವ ಕಪ್ಪೆಗೆ
ಮಿಲನ ಮುನ್ಸೂಚನೆ
-
ಅರ್ಧ ತಿಂದ ಭಿಕ್ಷುಕ ಮಗುವಿಗೆ
ಮುಂಜಾನೆಯ ಕನಸು
ಸೋಮಾರಿ ಚಂದ್ರನಿಗೆ ಜಡತ್ವ
-
ದೇವರ ಕ್ಯಾಲೆಂಡರ್ ಗೆ ಕೈ ಮುಗಿದಪ್ಪ
ಗಣೇಶ್ ಬೀಡಿ ಪೊಟ್ಟಣ
ಕೊಳಕು ಚಡ್ಡಿಯೊಳಗಿಟ್ಟ
-
ನಿನ್ನ ಮರೆಯಲು
ಕಲರ್ ಟೀವಿ ಹಚ್ಚಿದಾಗ
ಬ್ಲಾಕ್ ಅಂಡ್ ವೈಟ್ ಸಿನಿಮಾ
-
ದೇವರ ಫೋಟೋ ಸಿಕ್ಕಿಸಲು
ತಲೆ ಬಡಿಸಿಕೊಂಡ ಮೊಳೆ
ಶಿವ ಶಿವ ಎನ್ನುತ್ತಿದೆ ನಿನ್ನೆಯಿಂದಲೂ
No comments:
Post a Comment